నిత్యాత్ముఁడై యుండి నిత్యుఁడై వెలుఁగొందు - సత్యాత్ముఁడై యుండి సత్యమై తానుండు

ఈ వారం అన్నమయ్య కీర్తన (01.11.2014)

ప : నిత్యాత్ముఁడై యుండి నిత్యుఁడై వెలుఁగొందు - సత్యాత్ముఁడై యుండి సత్యమై తానుండు
ప్రత్యక్షమై యుండి బ్రహ్మమై యుండు సం- స్తుత్యుఁ డీతిరువేంకటాద్రివిభుఁడు

చ : ఏమూర్తి లోకంబులెల్ల నేలెడునాతఁ- డేమూర్తి బ్రహ్మాదులెల్ల వెదకెడునాతఁ-
డేమూర్తి నిజమోక్షమియ్యఁ జాలెడునాతఁ- డేమూర్తి లోకైకహితుఁడు
యేమూర్తి నిజమూర్తి యేమూర్తియునుఁ గాఁడు - యేమూర్తి త్రైమూర్తు లేకమైనయాతఁ-
డేమూర్తి సర్వాతుఁ డేమూర్తి పరమాత్ముఁ- డామూర్తి తిరువేంకటాద్రివిభుఁడు

చ : యేదేవుదేహమున నిన్ని యును జన్మించె - నేదేవుదేహమున నిన్నియును నణఁగె మరి
యేదేవువిగ్రహం బీసకల మింతయును - యేదేవునేత్రంబు లినచంద్రులు
యేదేవుఁ డీజీవులిన్నింటిలో నుండు - నేదేవుచైతన్య మిన్నిటికి నాధార-
మేదేవుఁ డవ్యక్తుఁ డేదేవుఁ డద్వంద్వుంఁ- డాదేవుఁ డీవేంకటాద్రివిభుఁడు

చ : యేవేల్పుపాదయుగ మిలయునాకాశంబు - యేవేల్పుపాదకేశాంతం బనంతంబు
యేవేల్పునిశ్వాస మీమహామారుతము - యేవేల్పునిజదాసు లీపుణ్యులు
యేవేల్పు సర్వేశుఁ డేవేల్పు పరమేశుఁ- డేవేల్పు భువనైకహితమనోభావకుఁడు
యేవేల్పు కడుసూక్ష్మ మేవేల్పు కడుఘనము - ఆవేల్పు తిరువేంకటాద్రివిభుఁడు

భావం :

        శ్రీ వేంకటేశ్వరుడు నిత్యస్వరూపుడై ఉండి నిత్యుడై ప్రకాశిస్తున్నాడు. సత్య స్వరూపుడగుట వలన సత్యుడు అనబడుచున్నాడు. లోకములో అందరికీ పరబ్రహ్మమై వెలుగొందు చున్నాడు.

    

    ఏ దివ్యమూర్తి లోకములనెల్ల పాలించుచున్నాడో, ఏ మూర్తిని బ్రహ్మాది దేవతలెల్ల వెదకుతున్నారో, ఏమూర్తి నిజమైన మోక్షము నియ్యగలడో, ఎవడు లోకమునకు హితము గూర్చు వాడో, ఎవడు నిజమైన మూర్తిగా (నిరాకారుడు) ఉండేవాడో, ఎవడు త్రిమూర్తులు ఏకమైన మూర్తిగా నున్నాడో, ఎవడు సర్వాత్ముడో, ఎవడు పరమాత్ముడో ఆ దివ్యమూర్తియే శ్రీ వేంకటగిరి నాధుడు.

        ఏ దేవుని శరీరమున ఇన్నియు పుట్టినవో, ఎవని శరీరమున ఇవన్నియు లయమగుచున్నవో, ఈ సృష్టి అంతయూ ఎవ్వని శరీరమో, సూర్యచంద్రులు ఎవ్వని నేత్రములో, ఎవడు ఈ సర్వజీవులలో అంతరాత్ముడై యున్నాడో, ఎవ్వని చైతన్య మీచేతనములకెల్లా నాధారమో,  ఏ దేవుడు అవ్యక్తుడో, ఎవడు అద్వితీయుడో, ఆ ఉచ్చ్వాస దేవుడే ఈ వేంకటాచల నాధుడు.

        భూమి, ఆకాశము ఏ వేల్పు పాదయుగ్మమో, ఎవని పాదములు తుదియు, అంతము లేనివో, ఈ మహావాయువు ఏ వేల్పు నిస్వాసమో, ఈ పుణ్యాత్ములు ఎవ్వనికి నిక్కమైన దాసులో, ఎవడు సర్వేశ్వరుడో, ఎవడు పరమేశ్వరుడో, ఎవడు ప్రపంచమంతటికీ  హితమనోభావకుడో, ఎవ్వడు మిక్కిలి సూక్ష్మమైనవాడో, ఎవ్వడు మిక్కిలి స్థూలమైనవాడో ఆ దేవుడే శ్రీ వేంకటేశ్వరుడు.

-- పొన్నాడ లక్ష్మి 

దేహము సంబంధము ఇవి దేహికి బని లేదు – ఊహించ నేర్చినవారలే ఓరుచుకుందురయ్యా!

27.9.14. ఈ వారం అన్నమయ్య కీర్తన.

ప. దేహము సంబంధము ఇవి దేహికి బని లేదు – ఊహించ నేర్చినవారలే ఓరుచుకుందురయ్యా!

౧.  విడువవు శీతోష్ణంబులు, విడువవు సుఖదుఖంబులు – వెడవెడ మరణ భయంబులు విడిచిన యందాకా    

     ఉడుగవు కాంక్షలు మమతలు నుద్యోగంబులు చింతలు -  పొడవగు విరక్తి తనలో బొడమిన యందాకా.

౨.   మానదు చిత్తవికారము, మానదు దుర్గుణ దోషము – మానదు భోగములన్నియు మానిన యందాకా,

      పోనీదు సేసిన దురితము, పోనీదు వ్రాత ఫలంబును – పూనిన తన యజ్ఞానము పోయిన యందాకా.

౩.     తెగవటు భవబంధంబులు తెగవెడయని గర్వంబులు – నిగిడిన యీయాత్మజ్ఞానము నీవిచ్చిన యందాకా .

        జగదేకవిభుడ శ్రీ వేంకటేశ్వర సర్వము నీ యానతికొలదే – తగులుచుండు నివి నిశ్చలముగ నీ దాస్యము

                                                                       కలిగిన యందాకా!

భావం:

          అన్ని విషయాలు దేహానికి మాత్రమె సంబధించినవి. ఆత్మకు వీటితో పని లేదు. పరిశీలింపగా దేహముయోక్కయు, దేహి(ఆత్మ) యొక్కయు స్వరూపమును చక్కగా నెరింగిన అత్మజులు మాత్రమె వీటిని అర్ధం చేసికొనగలరు.

          మరణ భయములు విడుచునంత వరకు శీతోష్ణములు, సుఖదఃఖములు మున్నగునవి ప్రాణిని విడువవు. పూర్తి వైరాగ్యము కలుగునంతవరకు కోరికలు, మమకారములు, అవి తీర్చుకొనుటకై చేసే ప్రయత్నములు, అవి విఫలమైనపుడు చింతలు తప్పవు.

          భోగములన్నియు వదులు కోనేవరకు మనోవికారము, దుర్గుణముల వలన కలుగు దోషములు తొలగవు. తన్నావహించిన అజ్ఞానము నసించువరకుచేసిన పాపము, నొసటి వ్రాతయొక్క ఫలము విడువవు.

                జగదేకవిభుడవైన శ్రీ వేంకటేశ్వరా! ఆత్మజ్ఞానమును నీవు ప్రసాదించువరకు ఈ సంసార బంధములు, ఎడతెగని గర్వములు తెగవు. అంతయు నీ ఆజ్ఞ ననుసరించియే జరుగుచున్నది. నిశ్చలమైన నీ దాస్యము చేకూరునంత వరకు పైన చెప్పిన బాధలన్నియు ప్రాణులను వెన్నంటియే యుండును. 

ఇందిరారమణు దెచ్చి ఇయ్యరో మాకిటువలె - అన్నమయ్య కీర్తన

Ponnada Lakshmi

1 min · 

ఈ వారం అన్నమయ్య కీర్తన: ఇందిరా రమణు దెచ్చి.... 6.9.14

అన్నమయ్య దేవతార్చన విగ్రహాలు ఎవరో దాచివేసినారు. అన్నమయ్య హృదయం పరితాపమునకు గురి అయి పరమాత్ముడితో ఎవరెవరికైతే అనుబంధం ఉన్నదో వారందరినీ పేరుపేరుతో పిలిచి స్వామిని తెచ్చి తనకీయమని వేడుకొంటున్నాడు.

ప. ఇందిరారమణు దెచ్చి ఇయ్యరో మాకిటువలె – పొంది ఇతని పూజించ పోత్తాయే నిపుడు !!

౧. ధారుణి మైరావణు దండించి రాము దెచ్చి నేరుపున మించిన అంజనీతనయా !
ఘోర నాగాపాశముల గొట్టివేసి ఈతని కారుణ్య మందినట్టి ఖగరాజ గరుడా ! !!

౨. నానాదేవతలకు నరసింహు గంభములో పానిపట్టి చూపినట్టి ప్రహ్లాదుడా !
మానవుడై కృష్ణ మహిమల విశ్వరూపు బూని బండి నుంచుకొన్న పోటుబంట యర్జునా! !!

౩. శ్రీ వల్లభునకు నశేష కైంకర్యముల శ్రీ వెంకాద్రివైన శేషమూరితీ !
కైవసమైనయట్టి కార్తవీర్యార్జునుడా ఈ దేవుని నీవేళ నిట్టె తెచ్చి మాకు నియ్యరే ! !!

భావం:

ఇందిరా రమణుని తెచ్చి మాకియ్యండి. ఈతని మనసారా పూజించే వేళయింది.

మైరావణుని జయించి రాముణ్ణి నేర్పుతో తెచ్చిన ఆంజనేయా, ఘోరమైన నాగపాశములతో బంధింపబడిన శ్రీరాముణ్ణి తన బలముతో నాగ పాశములను విడగొట్టి, ఆ రాముడి కరుణను పొందినట్టి గరుత్మంతుడా!

దేవతలందరికీ కంభములో వెలసినట్టి నరసింహ స్వామిని చూపినట్టి ప్రహ్లాదుడా, మానవుడవై జన్మించి అపురూపమైన విశ్వరూపమును దర్శించి తరించినట్టి అర్జునుడా!

శ్రీవల్లభునకు విశేషంగా కైంకర్యములను సమర్పించి సేవించుటకు శ్రీ వేంకటాద్రివైన ఆదిశేషువా, నీ సేవలతో స్వామిని కైవసము చేసుకొన్నట్టి కార్తవీర్యార్జునుడా! మీలో ఎవరి దగ్గిర స్వామి ఉన్నా మాకు ఇట్టే తెచ్చి ఇవ్వండి.

జయలక్ష్మీ వరలక్ష్మీ సంగ్రామ వీరలక్ష్మి ప్రియురాలవై హరికి( బెరసితి వమ్మ)

జయలక్ష్మీ వరలక్ష్మీ సంగ్రామ వీరలక్ష్మి
ప్రియురాలవై హరికి( బెరసితి వమ్మ

పాలజలనిధిలోని పసనైన మీగడ
మేలిమి తామెరలోని మించు వాసన
నీలవర్ణునురముపై నిండిన నిధానమవై
ఏలేవు లోకములు మమ్మేలవమ్మ

చందురుతోడబుట్టిన సంపదల మెరగువో
కందువ బ్రహ్మలగాచే కల్పవల్లివో
అందిన గోవిందునికి అండనే తోడు నీడై
వుందానవు మా యింటనే వుండవమ్మా

పదియారు వన్నెలతో బంగారు పతిమ
చెదరని వేదముల చిగురు బోడి
ఎదుట శ్రీవేంకటేశు నిల్లాలవై నీవు
నిధుల నిలిచే తల్లి నీవారమమ్మ

(బాలకృష్ణప్రసాద్  గారు పాడిన ఈ కీర్తన విని ఆనందించండి)

https://archive.org/details/JayalakshmiVaralakshmi

అమ్మా! నువ్వు జయములొసంగే జయలక్ష్మివి, వరములిచ్చే వరలక్ష్మివి, సంగ్రామంలో విజయం 

సమకూరేలా ధైర్యాన్నిచ్చే వీరలక్ష్మివి. శ్రీహరికి ప్రియురాలివై అతనిని కలసితివి.

పాల సమద్రములోని పసనైన (సారవంతమైన) మీగడవు. మేలిమి తామెరపువ్వులోని మంచి సువాసన 

గల దానవు. నీలవర్ణుని వక్షస్థలంపై సిరులతోనిండిన దానవై, లోకములను ఏలే తల్లివి, మమ్మల్ని దయతో 

ఏలవమ్మా!

చంద్రుని తోబుట్టువువై  సంపదలు నిండిన దానివై, సమర్ధవంతమైన బ్రహ్మలను  గాచే కల్పవల్లివి. 

గోవిందుని చేపట్టి తోడునీడగా ఉన్నదానివి. మా ఇంట్లో ఉండవమ్మా!

పదహారు వన్నెలతో గూడిన బంగారు బొమ్మవు నీవు. చెదరని వేదముల చివరనుండే చిగురుబోడివి. 

ఎదురుగా శ్రీ వేంకటేశ్వరుని ఇల్లాలివై ఉన్నావు. నిధులయందుండే తల్లీ! 

నీవారమమ్మా! మమ్మల్ని కటాక్షించు.   

ఇట్టి నా వెర్రితనము - అన్నమాచర్య కీర్తన

ఇట్టి నా వెర్రితనము లేమని చెప్పుకొందును ; నెట్టన నిందుకు నగి నీవే దయజూడవే,

పాటించి  నాలో నుండి పలికింతువు నీవు – మాటలాడ నేరుతునంటా మరి నే నహంకరింతును,

నీటున లోకములెల్లా నీవే యేలుచుండగాను – గాటాన దొరనంటా గర్వింతు నేను. !!

నెమ్మది బ్రజల నెల్లా నేవే పుట్టించ గాను – కమ్మి నేనే బిడ్డల గంటినంటా సంతసింతును,

సమ్మతి నీవే సర్వ సంపదలు నొసగ గాను – యిమ్ముల గడించుకొంటి నివి నే నంటా నెంతు !!

మన్నించి ఇహపరాలు మరి నీవే ఇయ్యగాను ఎన్నుకొని నా తపో మహిమ ఇది యనుచును,

ఉన్నతి శ్రీ వేంకటేశ నన్ను నేమి చూసేవు అన్నిటా నా యాచార్యు విన్నపమే వినవే !!

భావం:

దేవా! నన్ను నిమిత్తమాత్రుడుగా నుంచి నీవే నాచే పనులెల్ల చేయించుచున్నావు, కానీ అది నేను తెలిసికోనలేక వెర్రివాడనై అంతా నా స్వశక్తితో చేయుచున్నానని గర్వించుచున్నాను. ఇట్టి నా వెర్రితనమునకు నవ్వుకొని నీవే నన్ను దయజూడుమా!

నీవే నాలో నుండి పలు పలుకులు పలికించుచున్నావు. నేనది గుర్తింపక నేనెంత చక్కగా మాటలాడ నేర్చితినో చూడండని అహంకరించుచున్నాను. ఈ లోకములనన్ని సమర్దవంతముగా నీవే పరిపాలించుచున్నావు.  కానీ నేనే ఈ లోకముల కెల్లా దొరనని గర్వించుచున్నాను.

జీవులందరినీ పుట్టించు వాడవు నీవే. కానీ ఈ బిడ్డలను కన్నతండ్రినని మిక్కిలి సంతసించుచున్నాను. నాకున్న సంపదలన్నీ నీవిచ్చినవే. కానీ వివిధ ఉపాయములతో నేనే ఈ సిరుల నార్జిన్చుకొంటి నని తలంచుచున్నాను.

నన్ను మన్నించి ఇహపరములు నీవే ఇచ్చినావు. కానీ నా తపో మహిమ వల్ల వీటిని స్వాధీనము జేసికొంటినని భావించుచున్నాను. ఓ మహోన్నతుడైన శ్రీ వేంకటేశ్వరా !ఇంత  అజ్ఞానముతో విర్రవీగుతున్న నన్నేమి చూసేవు? కరుణామయుడవైన నీవిది చిత్తములో నుంచుకొనక ఈ దీనుని కాపాడుమని  నీతో నా గురుడు చేసిన విన్నపము విని నాపై దయ చూపుము. 

విజాతులన్నియు వృధా వృధా - అన్నమాచర్య కీర్తన

ఈ వారం అన్నమయ్య కీర్తన: విజాతులన్నియు వృధా వృధా..

          విజాతులన్నియు వృధా వృధా.- అజామిళాదుల కదియే జాతి.

౧.       జాతి భేదములు శరీర గుణములు

జాతి శరీరము సరి తోడనే చెడు,

          ఆతుమ పరిశుద్ధం బెప్పుడును అది నిర్దోషంబనాది

           ఈతల హరివిజ్ఞానపు దాస్యం - బిది యొక్కటే పొ సుజాతి.  // విజా //

౨.       హరి ఇందరిలో నంతరాత్ముడిదే

          ధరణి జాతి బేధము లెంచ

          పరమయోగు లీభావ మష్టమదము భవనికారమని మానిరి

          ధరణిలోన బరతత్వజ్ఞానము ధర్మమూలమే సుజాతి  //  విజాతి //

౩.       లౌకిక వైదిక లంపటులకు నివి

          కైకొను నవశ్య కర్తవ్యంబులు,

          శ్రీకాంతుడు శ్రీవేంకటపతి సేసిన సంపాదనమిందరికి

          మేకొని ఇన్నియు మీరినవారికి నీ నామమే సుజాతి  // విజాతి //

భావం:

          విభిన్నములైన జాతులన్నీ వ్యర్ధములే. అజమిళుడు మొదలగు కులభ్రష్టులైన వారిదే జాతి?

          జాతులలో కల భేదములన్నియు అశాస్వతమైన శరీరమునకు మాత్రమే! శరీరము నసించినంతనే అవియు నశించును. కానీ ఆత్మ ఎప్పుడూ పవిత్రమైనది. ఆత్మకు ఏ దోషములూ ఉండవు. అట్టి ఆత్మజ్ఞానముతో హరినెరిగి చేయు దాస్యమొక్కటే ఉత్తమజాతి లక్షణము.

          అదిగో! శ్రీహరి అన్ని జీవులలో అంతరాత్ముడై ఉన్నాడు ఆ పరమాత్ముని ధ్యానించు పరమ యోగులు లోకములో జాతి భేదములను ప్రధానముగా పాటించు అష్టమదములతో గూడి, మాయామయమైన సంసారమునకు సంభందించిన తిరస్కారభావమనియు తెలిసి జాతిభేదద్రుష్టిని విడనాడిరి. కావున పరతత్వమునేరిగి ధర్మములను పాటించుటే ఉత్తమజాతి లక్షణమగును.

          లౌకిక కార్యములలోనూ, వైదికాచారములలోనూ తలమునుకలై తపించువారికి మాత్రమే జాతిభేదములు పాటింప దగినవై ఉన్నవి. లక్ష్మీకాంతుడైన శ్రీ వేంకటేశ్వరుడు తనమాయచే జీవులకొసగిన సంపదలు. దేవా! ఈమాయను దాటి సదా మిమ్ము ధ్యానించు వారికి నీ నామ సంకీర్తనమొక్కటే సుజాతి లక్షణము.            

ఈ వారం అన్నమయ్య కీర్తన.    5.7.14.

ఎంతమాత్రమున నెవ్వరు దలచిన అంతమాత్రమే నీవు
అంతరాంతరములెంచిచూడ పిండంతేనిప్పటియన్నట్లు

కొలుతురు మిమువైష్ణవులు కూరిమితో విష్ణుడని
పలుకుదురు మిము వేదాంతులు పరబ్రహ్మంబనుచు
తలతురు మిము శైవులు తగినభక్తులను శివుడనుచు
అలరిపొగడుదురు కాపాలికులు ఆది భైరవుడవనుచు

సరినెన్నుదురు శాక్తేయులు శక్తిరూపు నీవనుచు
దరిశనములు మిము నానావిధులను తలపుల కొలదుల భజింతురు
సిరులమిమ్మునే యల్పబుద్ధి దలచిన వారికి నల్పంబవుదువు
గరిమల మిమునే ఘనమని తలచిన ఘనబుద్ధులకు ఘనుడవు

నీవలన గొరతేలేదు మరి నీరుకొలది తామెరవు
ఆవల భాగీరథిదరి బావుల ఆజలమే వూరినట్లు
శ్రీవేంకటపతి నీవైతే మము జేకొని వున్నదైవమని
యీవలనే నీశరణని యెదను యిదియే పరతత్త్వమునాకు

భావం :

దేవా! ఎవ్వరెవ్వరు ఎంతెంత మాత్రముగా నిన్ను తలచుదురో వారి వారికి అంతంత మాత్రముగానే నీవు తోచుచుందువు. అంతరాంతరములు  ఎంచి చూడగా పిండి కొలది రొట్టె అన్నట్లు.

వైష్ణవులు ప్రేమతో నిన్ను విష్ణుడని కొలుచుదురు. వేదాంతులు నిన్ను పరబ్రహ్మమని కొనియాడుదురు. శైవులు భక్తితో నిన్ను శివుడవని తలచుదురు. కాపాలికులు నిన్ను ఆదిభైరవుడవని పోగుడుదురు.

ఇక శాక్తేయులు నిన్ను శక్తి రూపుడవేయని భావింతురు. ఇట్లు తమతమ తలపులననుసరించి నిన్ను  అనేకవిధముల నుపాసించుదురు. శ్రీమంతుడవైన నిన్ను ఎవరు అల్పబుద్ధితొ  భావింతురో వారికి నీవు అల్పముగానే తోచెదవు. మహిమోపేతుడ వగు నిన్ను ఘనుదవని భావించిన ఘనబుద్దులకు నీవు ఘనుడవు గానే కన్పట్టుదువు.

నీవలన ఎటువంటి కొరత లేదు. నీరుకొలది తామెరవంటి వాడవు. గంగానది ఒడ్డున నున్న బావులలో గంగాజలమే ఊరిన యట్లు పలురీతుల నిన్ను భావించు వారి హృదయములలో వారి భావానుసారముగా నీవు తోచుచుందువు. శ్రీ వేంకటేశ్వరా! నీవే మమ్ము రక్షించు దైవమని నమ్మి నిన్ను శరణు వేడుతున్నాను. ఇదియే నాకు ముమ్మాటికి పరతత్వము.