అందరి వశమా హరి నెరుగ – కందువగ నొకడు గాని యెరుగడు. - అన్నమయ్య కీర్తన

ప.         అందరి వశమా హరి నెరుగ – కందువగ నొకడు గాని యెరుగడు.

౧.         లలితపు పది గొట్ల నొకడు గాని – కలుగడు శ్రీహరి గని మనగ.

            ఒలిసి తెలియు పుణ్యుల కొట్లలో ఇల నొకడు గాని యెరుగడు హరిని.

౨.         శృతి చదివిన భూసురకోట్లలో – గతియను  హరినే యోకానొకడు,

            అతిఘను లట్టిమహాత్మ కోటిలో – తతి నొకడు గాని తలచడు హరిని.

౩.          తుద కెక్కిన నిత్యుల కొట్లలో – పొదుగు నొకడు తలపున హరిని,

            గుదిగొను హరి భక్తుల కొట్లలో – వెదకు నొకడు శ్రీ వేంకటపతిని.

భావము:

            శ్రీహరిని తెలిసికొనుట అందరికీ వశమా? ఒకానొక విజ్ఞానికి తప్ప పరమాత్ముని తెలుసుకోవడం సాధ్యం కాదు.

            పదికోట్ల మందిలో ఏ ఒక్కడో తప్ప మరెవ్వడూ శ్రీహరిని గుర్తించలేడు. అట్లు గుర్తించిన పుణ్యాత్ములలో ఒక్కడు మాత్రమే హరితత్వమును పూర్తిగా తెలిసినవాడగును.

            వేదములు చదివిన కోట్లకొలది విప్రులలో ‘హరియే గతి’  అని చెప్పువాడు ఒకానొకడు మాత్రమే. అట్లు చెప్పు మహా ఘనులలో ఏ ఒక్కడో తప్ప హరిని  నిక్కముగా మదిలో భావింపడు.

            విద్యావివేకాదులచే ప్రతిష్ఠ గాంచిన నిత్యస్వరూపులైన అనేక జీవులలో తలపున శ్రీ హరిని నిలుపు వాడొక్కడే. అన్నివిధముల అతిశయించిన హరిభక్తుల సమూహములలో శ్రీ వేంకటేశ్వరుని నిజముగా అన్వేషించి కనుగొను వాడెవడో ఒకడే అగును.

పరమ సుజ్ఞానులకు ప్రపన్నులకు మరుగురుని మీదట మనసుండవలదా - అన్నమయ్య కీర్తన

పరమ సుజ్ఞానులకు ప్రపన్నులకు
మరుగురుని మీదట మనసుండవలదా

ఆకలిగొన్నవానికి అన్నముపై నుండినట్టు
యేకట వుండవలదా యీశ్వరునిపై
కాకల విటులచూపు కాంతలపై నుండినట్టు
తేకువ నుండవలదా దేవునిమీదటను

పసిబిడ్డలకు నాస పాలచంటిపై నున్నట్లు
కొసరే భక్తివలదా గోవిందునిపై
వెసదెరువరి తమి విడిదలపై నునట్టు
వసియించ వలదా శ్రీవల్లభుమీదను

వెప్పున ధనవంతుడు నిధి కాచియుందినట్టు
తప్పక శ్రీవేంకటేశు తగులవద్దా
అప్పసమైన భ్రమ ఆలజాలాలకున్నట్టు
యిప్పుడే వుండవలదా యీతని మీదను

భావం:                                  

            పరమ సుజ్ఞానులకు ప్రపత్తి మార్గమును అనుసరించువారికి మాధవునిపై సదా మనస్సు లగ్నమై ఉండవలెను.

            ఆకలిగొన్నవానికి అన్నముపై నుండునట్లు భక్తునికి పరమేస్వరునిపై తీవ్రమైన ఆపేక్ష ఉండవలెను. కామార్తులైన విటుల చూపు కాంతల పైననే ఉండినట్లు జిజ్ఞాసువులకు దేవుని మీదనే ధృడమైన దృష్టి ఉండవలెను.

            పసిబిడ్డలకు పాలచన్ను పైననే ఆశ ఉన్నట్లు భక్తులకు గోవిందుని పైననే భక్తి స్థిరమై ఉండవలెను. బాటసారి ఆపేక్ష అంతయు తాను  విడినచోటనే ఉన్నట్లు ప్రపన్నునకు శ్రీనాధుని మీదనే లక్ష్యముండవలెను.

            ధనికుడు ఏమరుపాటులేక నేర్పుతో తన ధనపేటికను కాచుకొని యుండునట్లు శరణాగతుడు శ్రీవేంకటేశ్వరునే అనుసరించి యుండవలెను. ఆలజాలములకు(నీటిలోనే తిరుగాడే పురుగులు)నీటిపై ఎడతెగని భ్రమణ మున్నట్లు ఈ దేవునిపై సంతత ప్రేమ, భక్తి యుండవలెను.

భవరోగ వైద్యుడవు పాటించ నీవొకఁడవే - అన్నమయ్య కీర్తన

భవరోగ వైద్యుడవు పాటించ నీవొకఁడవే
నవనీతచోర నీకు నమో నమో. IIపల్లవిII

అతివలనెడి సర్పా లధరాలు గఱచిన
తతి మదనవిషాలు తలకెక్కెను
మితిలేనిరతులఁ దిమ్మరివట్టె దేహాలు
మతిమఱచె నిందుకు మందేదొకో. IIభవII

పొలఁతులనెడిమహాభూతాలు సోఁకిన
తలమొలలు విడి బిత్తలై యున్నారుక్షతా
అలరుచెనకులచే నంగములు జీరలాయ
మలసి యిందుకు నిఁక మంత్రమేదొకో. IIభవII

తరుణులకాఁగిలనే తాపజ్వరాలు వట్టి
కరఁగి మేనెల్ల దిగఁగారఁజొచ్చెను
నిరతి శ్రీవేంకటేశ నీవే లోకులకు దిక్కు
అరుదుసుననుండే యంత్రమేదొకో

భావం:

        దేవా! ఆలోచించి చూడగా సంసారమను జబ్బుకు నీవొకడవే. ఓ వెన్నదొంగా!  నీకు దండము ,నీకు దండము.

        స్త్రీలనెడు పాములు పెదవులు గరచినంత పురుషులకు కామవిషములు తలకెక్కినవి.  అంతులేని రతిక్రీడలలో మునిగి తేలుటచే శరీరములు తిమ్మిరి పట్టినవి. మతిమరుపు కలిగినది. ఈ విషం దిగుటకు, ఈ తిమ్మిరి వదులుటకు తగిన మందేదో!

        స్త్రీ వ్యామోహం అనెడి పెద్ద భూతం సోకగా మనుజులు తలమొలలు వీడి ఒడలు తెలియక దిసమొలలుతో ఉన్నారు. కామక్రీడలకు సంబంధించిన నఖక్షత దంతక్షతాదులచే శరీరము అంతయు గీరలు పడినవి. ఈ దెయ్యమును విడిపించుటకు మంత్రమేదోకదా!!

        అంగనల ఆలింగనములనెడి తాప జ్వరములు పట్టి శరీరములెల్ల చెమటలు కారుచున్నవి. శ్రీ వెంకటేశ్వరా  ఈ విషమ పరిస్థితులలో ఉన్నవారికి నీవే రక్షకుడవు. ఈ చిక్కులనుండి విడివడి శాశ్వతమైన సుఖము పొందుటకు సాధనమైన యంత్రమేదో అనుగ్రహింప రాదా!!!

ఇందరు నీ కొక్కసరి ఎక్కువ తక్కువ లేదు – చెంది నీ సుద్దులు ఏమి చిత్రమో కాని. !!

 అన్నమయ్య కీర్తన:

ప. ఇందరు నీ కొక్కసరి ఎక్కువ తక్కువ లేదు – చెంది నీ సుద్దులు ఏమి చిత్రమో కాని. !!

౧. నీ నామ ముచ్చరించి నెరవేరె నొక్క మౌని, నీ నామము వినక నెరవేరె నొకడు,
పూని నిను నుతియించి భోగియాయె నొకడు, మోనమున నినుదిట్టి మోక్షమందే నొకడు. !!

౨. మతిలో నిన్ను దలంచి మహిమందే నొక యోగి, తతినిన్ను దలచకే తగిలె నిన్నొకడు,
అతిభక్తి బనిసేసి అధికుడాయె నొకడుమునీశ్వరుడు
, సతతము బనిగొని సఖుడాయె నొకడు. !!

౩. కౌగిటి సుఖములిచ్చి కలిసిరి గొందరు, ఆగి నినువెంట దిప్పి ఆవులు మేలందెను,
దాగక శ్రీవేంకటేశ దగ్గరైన దవ్వయిన మాగి నిన్ను దలపోసే మనసే గురుతు. !!

భావం:
దేవా!నీ యెడల అనుకూలముగా కొందరు, ప్రతికూలముగా కొందరు ప్రవర్తించినారు. ఎవరెట్లున్నను నీ దృష్టిలో అందరూ సమానులే. నీ చరిత్రలు యెంత చిత్రములో కదా!

ఒక మునీశ్వరుడు (నారదుడు) సతతము నీనామముచ్చరించి ముక్తి నొందెను. మరొకడు (ఘంటాకర్ణుడు) నీ నామము వినకయే ముక్తుడయ్యెను. ఒకడు (కుచేలుడు) భక్తితో నిన్ను స్తుతించి సంపన్నుడయ్యేను. మరొకడు (శిశుపాలుడు) దురాగ్రహముతో నిన్ను నిందించి మోక్షము పొందెను.

ఒకయోగి (శుకుడు) మనసులో నిన్ను సదా ధ్యానించి మహిమగల వాడయ్యెను. మరొకడు (అజామిళుడు) నిన్ను మదిలో తలపకయే నీ సాన్నిధ్యమునకు చేరెను. ఒకడు (ఉద్దవుడు) మిక్కిలి భక్తితో నీకు సేవ చేసి మహానీయుడయ్యెను. మరొకడు (అర్జునుడు) నీ సహాయము ఎల్లవేళలా పొంది నీకు మిత్రుడయ్యెను.

కొందరు (గోపికలు) నీకు ఆలింగన సౌఖ్యమునిచ్చి నిన్ను పొందిరి. ఆవులు కూడా నిన్ను తనవెంట తిప్పుకుని శుభములు వడసెను. శ్రీ వెంకటేశ్వరా! దగ్గరగా అయినను, దూరముగా అయినను నిన్ను చింతించు చిత్తమే నిన్ను పొందుటకు తగిన గురుతు.

నిత్యాత్ముఁడై యుండి నిత్యుఁడై వెలుఁగొందు - సత్యాత్ముఁడై యుండి సత్యమై తానుండు

ఈ వారం అన్నమయ్య కీర్తన (01.11.2014)

ప : నిత్యాత్ముఁడై యుండి నిత్యుఁడై వెలుఁగొందు - సత్యాత్ముఁడై యుండి సత్యమై తానుండు
ప్రత్యక్షమై యుండి బ్రహ్మమై యుండు సం- స్తుత్యుఁ డీతిరువేంకటాద్రివిభుఁడు

చ : ఏమూర్తి లోకంబులెల్ల నేలెడునాతఁ- డేమూర్తి బ్రహ్మాదులెల్ల వెదకెడునాతఁ-
డేమూర్తి నిజమోక్షమియ్యఁ జాలెడునాతఁ- డేమూర్తి లోకైకహితుఁడు
యేమూర్తి నిజమూర్తి యేమూర్తియునుఁ గాఁడు - యేమూర్తి త్రైమూర్తు లేకమైనయాతఁ-
డేమూర్తి సర్వాతుఁ డేమూర్తి పరమాత్ముఁ- డామూర్తి తిరువేంకటాద్రివిభుఁడు

చ : యేదేవుదేహమున నిన్ని యును జన్మించె - నేదేవుదేహమున నిన్నియును నణఁగె మరి
యేదేవువిగ్రహం బీసకల మింతయును - యేదేవునేత్రంబు లినచంద్రులు
యేదేవుఁ డీజీవులిన్నింటిలో నుండు - నేదేవుచైతన్య మిన్నిటికి నాధార-
మేదేవుఁ డవ్యక్తుఁ డేదేవుఁ డద్వంద్వుంఁ- డాదేవుఁ డీవేంకటాద్రివిభుఁడు

చ : యేవేల్పుపాదయుగ మిలయునాకాశంబు - యేవేల్పుపాదకేశాంతం బనంతంబు
యేవేల్పునిశ్వాస మీమహామారుతము - యేవేల్పునిజదాసు లీపుణ్యులు
యేవేల్పు సర్వేశుఁ డేవేల్పు పరమేశుఁ- డేవేల్పు భువనైకహితమనోభావకుఁడు
యేవేల్పు కడుసూక్ష్మ మేవేల్పు కడుఘనము - ఆవేల్పు తిరువేంకటాద్రివిభుఁడు

భావం :

        శ్రీ వేంకటేశ్వరుడు నిత్యస్వరూపుడై ఉండి నిత్యుడై ప్రకాశిస్తున్నాడు. సత్య స్వరూపుడగుట వలన సత్యుడు అనబడుచున్నాడు. లోకములో అందరికీ పరబ్రహ్మమై వెలుగొందు చున్నాడు.

    

    ఏ దివ్యమూర్తి లోకములనెల్ల పాలించుచున్నాడో, ఏ మూర్తిని బ్రహ్మాది దేవతలెల్ల వెదకుతున్నారో, ఏమూర్తి నిజమైన మోక్షము నియ్యగలడో, ఎవడు లోకమునకు హితము గూర్చు వాడో, ఎవడు నిజమైన మూర్తిగా (నిరాకారుడు) ఉండేవాడో, ఎవడు త్రిమూర్తులు ఏకమైన మూర్తిగా నున్నాడో, ఎవడు సర్వాత్ముడో, ఎవడు పరమాత్ముడో ఆ దివ్యమూర్తియే శ్రీ వేంకటగిరి నాధుడు.

        ఏ దేవుని శరీరమున ఇన్నియు పుట్టినవో, ఎవని శరీరమున ఇవన్నియు లయమగుచున్నవో, ఈ సృష్టి అంతయూ ఎవ్వని శరీరమో, సూర్యచంద్రులు ఎవ్వని నేత్రములో, ఎవడు ఈ సర్వజీవులలో అంతరాత్ముడై యున్నాడో, ఎవ్వని చైతన్య మీచేతనములకెల్లా నాధారమో,  ఏ దేవుడు అవ్యక్తుడో, ఎవడు అద్వితీయుడో, ఆ ఉచ్చ్వాస దేవుడే ఈ వేంకటాచల నాధుడు.

        భూమి, ఆకాశము ఏ వేల్పు పాదయుగ్మమో, ఎవని పాదములు తుదియు, అంతము లేనివో, ఈ మహావాయువు ఏ వేల్పు నిస్వాసమో, ఈ పుణ్యాత్ములు ఎవ్వనికి నిక్కమైన దాసులో, ఎవడు సర్వేశ్వరుడో, ఎవడు పరమేశ్వరుడో, ఎవడు ప్రపంచమంతటికీ  హితమనోభావకుడో, ఎవ్వడు మిక్కిలి సూక్ష్మమైనవాడో, ఎవ్వడు మిక్కిలి స్థూలమైనవాడో ఆ దేవుడే శ్రీ వేంకటేశ్వరుడు.

-- పొన్నాడ లక్ష్మి 

దేహము సంబంధము ఇవి దేహికి బని లేదు – ఊహించ నేర్చినవారలే ఓరుచుకుందురయ్యా!

27.9.14. ఈ వారం అన్నమయ్య కీర్తన.

ప. దేహము సంబంధము ఇవి దేహికి బని లేదు – ఊహించ నేర్చినవారలే ఓరుచుకుందురయ్యా!

౧.  విడువవు శీతోష్ణంబులు, విడువవు సుఖదుఖంబులు – వెడవెడ మరణ భయంబులు విడిచిన యందాకా    

     ఉడుగవు కాంక్షలు మమతలు నుద్యోగంబులు చింతలు -  పొడవగు విరక్తి తనలో బొడమిన యందాకా.

౨.   మానదు చిత్తవికారము, మానదు దుర్గుణ దోషము – మానదు భోగములన్నియు మానిన యందాకా,

      పోనీదు సేసిన దురితము, పోనీదు వ్రాత ఫలంబును – పూనిన తన యజ్ఞానము పోయిన యందాకా.

౩.     తెగవటు భవబంధంబులు తెగవెడయని గర్వంబులు – నిగిడిన యీయాత్మజ్ఞానము నీవిచ్చిన యందాకా .

        జగదేకవిభుడ శ్రీ వేంకటేశ్వర సర్వము నీ యానతికొలదే – తగులుచుండు నివి నిశ్చలముగ నీ దాస్యము

                                                                       కలిగిన యందాకా!

భావం:

          అన్ని విషయాలు దేహానికి మాత్రమె సంబధించినవి. ఆత్మకు వీటితో పని లేదు. పరిశీలింపగా దేహముయోక్కయు, దేహి(ఆత్మ) యొక్కయు స్వరూపమును చక్కగా నెరింగిన అత్మజులు మాత్రమె వీటిని అర్ధం చేసికొనగలరు.

          మరణ భయములు విడుచునంత వరకు శీతోష్ణములు, సుఖదఃఖములు మున్నగునవి ప్రాణిని విడువవు. పూర్తి వైరాగ్యము కలుగునంతవరకు కోరికలు, మమకారములు, అవి తీర్చుకొనుటకై చేసే ప్రయత్నములు, అవి విఫలమైనపుడు చింతలు తప్పవు.

          భోగములన్నియు వదులు కోనేవరకు మనోవికారము, దుర్గుణముల వలన కలుగు దోషములు తొలగవు. తన్నావహించిన అజ్ఞానము నసించువరకుచేసిన పాపము, నొసటి వ్రాతయొక్క ఫలము విడువవు.

                జగదేకవిభుడవైన శ్రీ వేంకటేశ్వరా! ఆత్మజ్ఞానమును నీవు ప్రసాదించువరకు ఈ సంసార బంధములు, ఎడతెగని గర్వములు తెగవు. అంతయు నీ ఆజ్ఞ ననుసరించియే జరుగుచున్నది. నిశ్చలమైన నీ దాస్యము చేకూరునంత వరకు పైన చెప్పిన బాధలన్నియు ప్రాణులను వెన్నంటియే యుండును. 

ఇందిరారమణు దెచ్చి ఇయ్యరో మాకిటువలె - అన్నమయ్య కీర్తన

Ponnada Lakshmi

1 min · 

ఈ వారం అన్నమయ్య కీర్తన: ఇందిరా రమణు దెచ్చి.... 6.9.14

అన్నమయ్య దేవతార్చన విగ్రహాలు ఎవరో దాచివేసినారు. అన్నమయ్య హృదయం పరితాపమునకు గురి అయి పరమాత్ముడితో ఎవరెవరికైతే అనుబంధం ఉన్నదో వారందరినీ పేరుపేరుతో పిలిచి స్వామిని తెచ్చి తనకీయమని వేడుకొంటున్నాడు.

ప. ఇందిరారమణు దెచ్చి ఇయ్యరో మాకిటువలె – పొంది ఇతని పూజించ పోత్తాయే నిపుడు !!

౧. ధారుణి మైరావణు దండించి రాము దెచ్చి నేరుపున మించిన అంజనీతనయా !
ఘోర నాగాపాశముల గొట్టివేసి ఈతని కారుణ్య మందినట్టి ఖగరాజ గరుడా ! !!

౨. నానాదేవతలకు నరసింహు గంభములో పానిపట్టి చూపినట్టి ప్రహ్లాదుడా !
మానవుడై కృష్ణ మహిమల విశ్వరూపు బూని బండి నుంచుకొన్న పోటుబంట యర్జునా! !!

౩. శ్రీ వల్లభునకు నశేష కైంకర్యముల శ్రీ వెంకాద్రివైన శేషమూరితీ !
కైవసమైనయట్టి కార్తవీర్యార్జునుడా ఈ దేవుని నీవేళ నిట్టె తెచ్చి మాకు నియ్యరే ! !!

భావం:

ఇందిరా రమణుని తెచ్చి మాకియ్యండి. ఈతని మనసారా పూజించే వేళయింది.

మైరావణుని జయించి రాముణ్ణి నేర్పుతో తెచ్చిన ఆంజనేయా, ఘోరమైన నాగపాశములతో బంధింపబడిన శ్రీరాముణ్ణి తన బలముతో నాగ పాశములను విడగొట్టి, ఆ రాముడి కరుణను పొందినట్టి గరుత్మంతుడా!

దేవతలందరికీ కంభములో వెలసినట్టి నరసింహ స్వామిని చూపినట్టి ప్రహ్లాదుడా, మానవుడవై జన్మించి అపురూపమైన విశ్వరూపమును దర్శించి తరించినట్టి అర్జునుడా!

శ్రీవల్లభునకు విశేషంగా కైంకర్యములను సమర్పించి సేవించుటకు శ్రీ వేంకటాద్రివైన ఆదిశేషువా, నీ సేవలతో స్వామిని కైవసము చేసుకొన్నట్టి కార్తవీర్యార్జునుడా! మీలో ఎవరి దగ్గిర స్వామి ఉన్నా మాకు ఇట్టే తెచ్చి ఇవ్వండి.