ఇట్టి ముద్దులాడి బాలుడేడవాడు వాని .. పట్టి తెచ్చి పొట్టనిండ పాలు వోయరే - అన్నమయ్య కీర్తన

ఇట్టి ముద్దులాడి బాలుడేడవాడు వాని .. పట్టి తెచ్చి పొట్టనిండ పాలు వోయరే
..
కామిడై పారిదెంచి కాగెడి వెన్నలలోన .. చేమ పూవు కడియాల చేయిపెట్టి
చీమ గుట్టెనని తన చెక్కిట కన్నీరు జార .. వేమరు వాపోయె వాని వెడ్డువెట్టరే
..
ముచ్చువలె వచ్చి తన ముంగమురువులచేయి .. తచ్చెడి పెరుగులోన తగవెట్టి
నొచ్చెనని చేయిదీసి నోరనెల్ల జొల్లుగార .. వొచ్చెలి వాపోవువాని నూరడించరే
..
ఎప్పుడు వచ్చెనో మా యిల్లు జొచ్చి పెట్టేలోని .. చెప్పరాని వుంగరాల చేయిపెట్టి
అప్పడైన వేంకటేద్రిఅసవాలకుడు గాన .. తప్పకుండ బెట్టెవాని తలకెత్త రే

భావం:

శ్రీ కృష్ణుని అల్లరి పనులు, ఆగడాలు మనకు తెలియనివి కావు. ఏమీ ఎరగనట్లు చేసేవన్నీ చేసి అమ్మ దగ్గిర గారాలు పోవడం కూడా వింత ఏమీకాదు. అదే ఈకీర్తనలో అన్నమయ్య మనకు చెప్తున్నాడు.

          ముద్దులు కురిపించే ఇటువంటి బాలుడు ఎక్కడ ఉన్నాడో ? వానిని పట్టి తీసుకువచ్చి కడుపునిండా పాలు పొయ్యమని యశోదమ్మ చెప్తూంది.

          అల్లరిచేసి కట్లు తెంచుకుని వచ్చి కాగుతున్న వెన్నలలో చేమంతిపూల కడియాల చెయ్యిపెట్టి, చిర చిరలాడుతున్న చెయ్యిని చూపించి “చీమలు కుట్టేసాయమ్మా!” అని చెక్కిళ్ళ నిండా కన్నీరు కారుస్తూ దుఃఖిస్తున్న ఆ చిన్ని బాలుని కాస్త ఓదార్చమని చెప్తూంది ఆ పిచ్చితల్లి.

          దొంగలాగా వచ్చి తన బంగారుమురువులు తొడిగిన చేయిని కవ్వంతో చిలుకుతున్న పెరుగులో పెట్టి ఆ కవ్వముతాకిడికి  “అబ్బా! నొప్పెడుతున్నాదమ్మా!”  అని చెయ్యి బయటికి తీసి నోరంతా చొల్లు కార్చుకుంటూ వాపోవు వానిని ఊరడించమని అంటున్నది.

          ఎప్పుడు వచ్చేడో, మాఇంట్లో జొరబడి పెట్టిలోన ఉన్న వాటికోసం తన ఉంగరాల చేయి పెట్టాడు. మనందరికీ తండ్రి అయిన  వేంకటేశ్వరుడు శక్తిమంతుడు కావున ఆ పెట్టి అతని తలమీదకి ఎత్తమని చెప్తూంది.

          శ్రీ వేంకటేశ్వరుడు అన్ని విధములయిన శక్తియుక్తులు కలవాడు కావున మన బరువు బాధ్యతలున్న పెట్టిని అతని తలపై పెట్టి మనం నిశ్చింతగా ఉండవచ్చని అన్నమయ్య అభిప్రాయమేమో.        

(పొన్నాడ లక్ష్మి)