అమ్మకి స్మృత్యంజలి

అమ్మకి స్మృత్యంజలి..

చిన్న వయసులోనే భర్తని కోల్పోయి
ఆత్మస్థైర్యంతో సంసార నావను
నడిపించిన ధీశాలి మా అమ్మ.

కలిమి లేకపోయినా చెలిమిని పంచిన
అనురాగమూర్తి మా నాన్నగారిని నిత్యం
స్మరించుకుంటూ కర్తవ్యపాలన చేసిన మా అమ్మ.

దగ్గిరబంధువులే దగా చేసినా వారిని
నిందించకుండా కర్మసిధ్ధాంతాన్ని నమ్ముకుని
బతుకు బండిని నడిపిన మా అమ్మ.

సంసారపు బండిలో ఒక చక్రం విరిగిపోయినా
రెండుచక్రాలు తానే ఐయి నేర్పుతో, ఓర్మితో
సంసారనౌకను ఒడ్డుకు చేర్చించిన మా అమ్మ.

ఇంటికి వచ్చినవారికి తనకున్నదానిలో
ఆప్యాయంగా కొసరి కొసరి వడ్డించి,
వారిని తృప్తిపరచి ఆనందం పొందిన మా అమ్మ.

కష్టాలకడలిలో ఎదురీదుతూ మాకు
విద్యాబుధ్ధులు నేర్పించి, మా జీవితాలకు
ఒక అర్ధం పరమార్ధం చూపించిన మార్గదర్సి మా అమ్మ.

- పొన్నాడ లక్ష్మి