అమ్మా! నిర్భయా!

అమ్మా! నిర్భయా!

తూట్లు పడిన దేహంతో, ఛిద్రమయిన పేగులతో, మృత్యువుతో
పోరాడుతున్న నిన్ను చూచి, విదేశీ వైద్యులు సైతం విస్తుబోయారు తల్లీ!
ఒక అబలను నిస్సహాయస్థితిలోకి నెట్టి ఇంత రాక్షసంగా
అనుభవించొచ్చని వారికప్పుడే తెలిసిందేమోనమ్మా!
ఆరుగురి మానవమృగాల చేతులలో ఆటబొమ్మవయి
ఎన్ని చిత్రహింసల పాలయినావో? ఎంతగా ఆక్రోశించావో తల్లీ!
నీ ఆక్రందన, ఆవేదన ఒక్క దేవుడి కయినా వినిపించలేదంటే
ఆ భగవంతునిపైననే నమ్మకం పోయింది అమ్మా!
మంచితనంతో వారిని మార్చాలని మానవతావాదులు
నీతిబోధలు చేస్తుంటే ఔరా! ఎంత దయ! అనిపించిందమ్మా..
నువ్వు పడిన చిత్రహింస తలుచుకుంటె మాకే నిద్ర రావట్లేదు,
ఇంక నిన్ను కన్నవారిని ఏమని ఓదార్చగలము తల్లీ!
వేదభూమి, పవిత్ర భారతావని ఇంత క్రూర రాక్షసులకు ఆలవాలమా?
అని ప్రపంచమంతా నివ్వెరబోయి నిశ్చేష్టిత అయింది తల్లీ!
ఆ నరరూప రాక్షసులకు ఇంతవరకూ శిక్ష అమలు జరగలేదంటే
ఎక్కడుంది న్యాయం? ఏదీ మానవత్వం? ఏ స్త్రీకయినా ఏదీ రక్షణ ?